Президенти Ҷумҳурии Тоҷикистон Эмомалӣ Раҳмон дар доираи ин сафар бо валиаҳди мамлакати Арабистони Саудӣ, муовини сарвазир, вазири дифоъ ва ҳавопаймоии мамлакат Амир Султон ибни Абдулазиз мулоқот намуд.
Дар мулоқот Президенти Ҷумҳурии Тоҷикистон Эмомалӣ Раҳмон бори дигар ба тамоми мардуми Арабистони Саудӣ бо сабаби вафоти Малик Фаҳд, ки аз шахсиятҳои сиёсии варзида ва обрӯманди ҷаҳон ба шумор мерафт, таъзия баён карда, изҳори умед намуд, ки аълоҳазрат Амир Султон ибни Абдулазиз роҳи шодравонро идома дода, ба густариши муносибот бо Ҷумҳурии Тоҷикистон ҷаҳд хоҳад кард.
Мавриди зикр аст, ки моҳи майи соли 2003-юм дар шаҳри Душанбе байни Ҷумҳурии Тоҷикистон ва Арабистони Саудӣ Созишномаи умумии ҳамкорӣ дар соҳаи иқтисод, тиҷорат, сармоягузорӣ, техника, фарҳанг, саёҳат, варзиш ва масъалаҳои ҷавонон ба имзо расид.
Амир Султон ибни Абдулазиз бори дигар омодагии Арабистони Саудиро ҷиҳати таҳкими муносиботи дуҷониба бо Ҷумҳурии Тоҷикистон изҳор дошта, гуфт, ки ҷиҳати сармоягузорӣ дар инкишофи робитаҳои серҷабҳаю бисёрсамта бо Ҷумҳурии Тоҷикистон талош хоҳад кард.