10 октябр дар пойтахти Ҷумҳурии Фаронса Конфронси 33-юми кулли ЮНЕСКО баргузор шуд, ки дар он Президенти Ҷумҳурии Тоҷикистон Эмомалӣ Раҳмон иштирок ва суханронӣ намуд.
"Мавзӯи асосии конфронс маърифати ҳамагонист ва басо рамзист, ки Рӯзи Тоҷикистон ва фарҳанги бостонии он дар ЮНЕСКО ба ин рӯйдоди бузург рост омад", - гуфт аз минбари конфронс Президенти Ҷумҳурии Тоҷикистон Эмомалӣ Раҳмон.
Сарвари давлати Тоҷикистон Эмомалӣ Раҳмон Мусо Ибни Ҷаъфар ибни Ҳасанро ба муносибати ба мақоми олӣ ва масъул - Раиси Конфронси кулли ЮНЕСКО интихоб шуданаш табрик намуда, афзуд, ки дар шароити кунунӣ ҷомеаи башарӣ бояд бо назардошти моҳияти хатарҳои муосир ва тамоюлоти харобгари фарҳангӣ ҳамкории олимону адибон, аҳли санъату фарҳангро ба хотири ҳифзи фарҳангҳо ва тавсеаи муколамаи тамаддунҳо ва пешгирии таҳдидҳои ҳалокатбори бархӯрдҳо ҳамаҷониба таҳким бахшад.
"Дар Ҷумҳурии Тоҷикистон бо истифодаи нерӯ ва омилҳои фаъол ба ҳалли решаҳои иҷтимоӣ, маърифату фарҳанг, ба хусус эҷоду таъмини фарҳанги сулҳ талошҳои рӯзафзун ба харҷ дода мешавад", - таъкид кард Эмомалӣ Раҳмон ва баҳои баланди ЮНЕСКО-ро барои саҳми бузурги эҷоди сулҳ ба пойтахти Тоҷикистон - шаҳри Душанбе сазовор донистани ҷоизаи шаҳри сулҳ боиси сарфарозии Тоҷикистон маънидод кард.
"Иқдомоти бузурги фарҳангии тоҷикистониён - рушди ҳамаҷонибаи "Шашмақом", тарғиби суннати хоси мусиқии миллии "Фалак", таҷлили ҷашни бузургони илму адабу фарҳанг, бузургдошти шаҳрҳои бостонӣ дар ҳамкорӣ ва ҳамоҳангӣ бо ЮНЕСКО аз қадамҳои устувори шоҳроҳи ҳадафҳои бузурганд", - тазаккур дод Президенти Ҷумҳурии Тоҷикистон.
Дар хатми суханронии худ Президенти Ҷумҳурии Тоҷикистон Эмомалӣ Раҳмон як қатор таклифу пешниҳодҳои судманди фарогири ҳамкориҳои қавитари фарҳангӣ, пешгирии аҳолии сайёра аз мухолифату низоъҳои сиёсӣ ва иҷтимоию низомӣ баён дошт, ки мавриди пуштибонии амиқи иштирокчиёни конфронс қарор гирифт.