13 апрел Президенти Ҷумҳурии Тоҷикистон Эмомалӣ Раҳмон сафири Фавқулодда ва Мухтори ИМА дар Ҷумҳурии Тоҷикистон ҷаноби Ричард Хоуглендро бо хоҳиши ӯ ба ҳузур пазируфт.

Дар ҷараёни мулоқот масъалаҳои мубориза бар зидди терроризм ва экстремизми байналмилалӣ, қочоқи маводи мухаддир, инчунин рушди ҳамкориҳои иқтисодии миёни Ҷумҳурии Тоҷикистон ва ИМА баррасӣ шуданд.

Дар оғози сӯҳбат Сарвари давлат изҳор дошт, ки Ҳукумати Тоҷикистон ба инкишофи устувори ҳамкориҳо бо ИМА мароқи хоса зоҳир менамояд, ки он ба туфайли робитаҳои сиёсӣ қувват гирифта истодааст.

Ҷонибҳо ривоҷи муносибатҳои дутарафаро дар бахшҳои сиёсию низомӣ ва иқтисодию гуманитарӣ ифодаи амиқи истифодаи самараноки имкониятҳои мавҷуда арзёбӣ намуданд.

Таъкид ёфт, ки робитаҳои ба тарафҳо афзалиятнок на танҳо ҷавобгӯи майли Тоҷикистону Амрико, балки омили муҳими суботу оромии минтақа мебошад.

Дар ҷараёни сӯҳбат инчунин ба масъалаи амнияти минтақа,  ба хусус вазъи кунунии Афғонистон, саҳмгирӣ дар марҳилаи барқарорсозии ин кишвари азиятдида ва дигар мавзӯоти муҳими байналмилалию минтақавӣ дахл карда шуд.

Ҷонибҳо изҳори умеди комил намуданд, ки дурнамои ҳамкориҳои Тоҷикистону Амрико неку самарабахш мебошад.

Сӯҳбат дар фазои созандаю самимӣ ҷараён гирифт.