Субҳи рӯзи 17 сентябр Президенти Ҷумҳурии Тоҷикистон Эмомалӣ Раҳмон бо раисони вилоятҳои Суғду Хатлон сӯҳбати телефонӣ анҷом дод. Баъди шунидани гузориш оид ба вазъи кунунии ҷамъоварии ҳосили зироатҳои кишоварзӣ, аз ҷумла пахта, Сарвари давлат дастур дод, ки суръати ҷамъоварии ҳосили пахтаро тезонанд, зеро мувофиқи маълумотҳои пешакӣ охирҳои моҳи сентябр вазъи ҳаво тағйир хоҳад ёфт. Президенти Ҷумҳурии Тоҷикистон Эмомалӣ Раҳмон таъкид кард, ки бояд қувваҳои қобили меҳнат танҳо бо роҳи ҳавасмандии молиявӣ ба кори саҳро ҷалб шаванд ва аз таҳсил бозмондани хонандагон қатъиян манъ аст.
Сарвари давлат зимин сӯҳбат ҳамзамон ба масъалаҳои пешрафти соҳаҳои маорифу тандурустӣ, таъмини саривақтии маошу нафақа ва омодагӣ ба мавсими зимистонгузаронӣ мароқ зоҳир намуда, дар ҳамин замина ба раиси вилояти Суғд Қосим Қосимов ва раиси вилояти Хатлон Амиршо Миралиев супоришҳои мушаххас дод.