21 октябр Президенти Ҷумҳурии Тоҷикистон Эмомалӣ Раҳмон ҳайати намояндагони Иттиҳоди Аврупоро бо сарварии раисикунанда дар Иттиҳоди Аврупо Киис Фратерман ба ҳузур пазируфт.

Дар мулоқот, ки дар фазои созандаю самимӣ ҷараён гирифт, муҳимтарин масъалаҳои вобаста ба ҳамкориҳои Ҷумҳурии Тоҷикистон бо Иттиҳоди Аврупо баррасӣ шуданд.

Таҳкими робитаҳои иқтисодию тиҷоратӣ бо Иттиҳоди Аврупо, - изҳор дошт Президенти Ҷумҳурии Тоҷикистон Эмомалӣ Раҳмон, -аз самтҳои афзалиятноки сиёсати хориҷии Ҳукумати Ҷумҳурии Тоҷикистон аст. Баъди имзои созишнома бо 25 мамлакати узви иттиҳод, ки маросими расмии он 11 октябри соли 2004 дар Люксембург баргузор гардида буд, ин раванд ба марҳилаи сифатан эътимодбахш ворид шуд.

Дар вохӯрӣ таъкид гардид, ки имзои созишнома далели бебаҳси пешрафти бобарори иқтисодии Ҷумҳурии Тоҷикистон, татбиқи барномаҳои стратегӣ, ислоҳоти муваффақонаи соҳаҳои мухталифи ҳаёти ҷомеаи навини Тоҷикистон ва қабл аз ҳама сиёсати фарогири талаботи замони нав, талошҳои дурбинонаву созандагии Президенти Ҷумҳурии Тоҷикистон Эмомалӣ Раҳмон мебошад.

Дар ҷараёни мулоқот ба мавзӯъҳои марбут ба ҳамкориҳои бисёрҷониба дар доираи барномаи кӯмакҳои калони молиявӣ, барномаи амнияти озуқаворӣ, барномаи лоиҳаи кӯмакҳои башардӯстона, барномаи ТАСИС ва бо назардошти аҳамияти минтақавӣ дар робита бо хазинаи байналмилалии Наҷоти Арал диққати махсус дода шуд.

Ба мавзӯоти байналмилалӣ дахл намуда, ҷонибҳо афзоиши доираи фаъолияти терроризм, гардиши ғайриқонунии маводи мухаддир ва дигар таҳдидҳои глобалиро мушкилоти хатарноку ташвишовари ҷомеаи башарӣ номиданд.

Истеҳсоли рӯзафзуни маводи мухаддир асоси таъминоти молиявии гурӯҳҳои террористии олам аст, - афзуд Сарвари давлати Тоҷикистон, аз ин рӯ бо вусъати раванди барқарорсозии иқтисодии Афғонистон пешгирӣ намудани ин зуҳуроти номатлуб аз вазифаҳои аввалиндараҷаи айём бояд бошад.

Ҳайати бонуфузи Иттиҳоди Аврупо пешниҳодоти асосноки Президенти Ҷумҳурии Тоҷикистон Эмомалӣ Раҳмонро дар мавриди таҳкими мубориза алайҳи хатарҳои умумибашарӣ ва қувват бахшидани ҳамкориҳои иқтисодию тиҷоратии миёни Иттиҳоди Аврупо бо мамолики Осиёи Марказӣ бо қаноатмандӣ ҷонибдорӣ карданд.