23 ноябр Эмомалӣ Раҳмон бо мақсади ривоҷу равнақи минбаъдаи адабиёти бадеӣ ва санъати мусиқӣ, ҳавасманд гардонидани адибон ва композиторон барои бештару беҳтар инъикос намудани арзишҳои миллӣ ва умумибашарии маънавию фарҳангӣ, ифтихори миллӣ ва ғояҳои ватандӯстӣ дар бораи таъсиси ҷоизаҳои Иттифоқи нависандагони Тоҷикистон ва ҷоизаи Иттифоқи композиторони Тоҷикистон фармон ба тасвиб расонид.

Мутобиқи Фармони Президенти Тоҷикистон ду ҷоизаи ба номи Садриддин Айнӣ ва ду ҷоизаи ба номи Мирзо Турсунзода дар соҳаи адабиёт, таҳқиқ ва тарҷумаи осори бадеӣ; як ҷоизаи ба номи Борбад дар соҳаи санъати мусиқӣ муқаррар карда шудааст.

Пардохти ҷоизаҳо ба Иттифоқии нависандагони Тоҷикистон ва Иттифоқии композиторони Тоҷикистон ба маблағи мутаносиб ба 1000 (як ҳазор) доллари ШМА барои ҳар як ҷоиза дар ду сол як маротиба аз ҳисоби фонди захиравии Президенти Ҷумҳурии Тоҷикистон амалӣ гардонида мешавад.

Ҳамчунин бо ҳамин Фармони худ Сарвари давлат Раёсатҳои Иттифоқи нависандагони Тоҷикистон ва Иттифоқи композиторони Тоҷикистонро вазифадор намудааст, ки дар мӯҳлати як моҳ низомномаи ҷоизаҳои мазкурро таҳия ва тасдиқ намоянд.