23 декабр Президенти Ҷумҳурии Тоҷикистон Эмомалӣ Раҳмон «Дар бораи дастгирии молиявии мактаб-интернатҳои ҷумҳуриявии ноҳияҳои Тавилдара, Ҳисор, Тоҷикобод ва шаҳри Душанбе» санад ба имзо расонид.

Мутобиқи амри Сарвари давлат Вазорати молияи Ҷумҳурии Тоҷикистон вазифадор гардид, ки аз ҳисоби Фонди захиравии Президенти Ҷумҳурии Тоҷикистон бо ин мақсад 90000 (навад ҳазор) сомонӣ ҷудо намояд.

Ин маблағ ба Вазорати маорифи Ҷумҳурии Тоҷикистон 70000 (ҳафтод ҳазор) сомонӣ, аз ҷумла барои мактаб-интернати ҷумҳуриявии кӯдакони ятим дар ноҳияи Тавилдара ҷиҳати таъмини кӯдакон бо хӯрока 20000 (бист ҳазор) сомонӣ; барои мактаб-интернати ҷумҳуриявии бачагони нобино ва сустбини ноҳияи Ҳисор 30000 (си ҳазор) сомонӣ, аз он барои таъмири боми мактаб-интернат 20000 (бист ҳазор) сомонӣ ва таъмини кӯдакон бо хӯрока 10000 (даҳ ҳазор) сомонӣ; барои мактаби махсуси ҷумҳуриявӣ дар шаҳри Душанбе ҷиҳати таъмини кӯдакон бо хӯрока 20000 (бист ҳазор) сомонӣ равона карда мешавад.

Ба буҷети ноҳияи Тоҷикобод барои таъмири хона-интернати бачагони ятим дар деҳаи Нушор 20000 (бист ҳазор) сомонӣ ҷудо карда шудааст.

Президенти Тоҷикистон Эмомалӣ Раҳмон ба Вазорати маорифи Ҷумҳурии Тоҷикистон ва Раиси ноҳияи Тоҷикобод супориш дод, ки истифодаи мақсадноки маблағҳои ҷудошударо таъмин намуда, ба Вазорати молияи Ҷумҳурии Тоҷикистон ҳисоботи хароҷоти анҷомдодаро пешниҳод намояд.