16 май Президенти Ҷумҳурии Тоҷикистон Эмомалӣ Раҳмон бо раисони вилояти Суғд, ноҳияҳои Ваҳдат ва Ҳисор телефонӣ сӯҳбат кард.
Дар ҷараёни сӯҳбат вазъи кишти баҳорӣ, афзун гардонидани маҳсулоти кишоварзӣ, ободонии маҳалҳои аҳолинишин, бо компютерҳо таъмин намудани мактабҳо ва дигар масъалаҳо муҳокима шуданд.
Президенти кишвар ба раисони вилоят ва ноҳияҳои номбаршуда супориш дод, ки барои рафъи зарари боришоти имсола ба соҳаи кишоварзӣ ба кишти зироатҳои полезӣ суръат бахшида, ҷиҳати таъмини талаботи бозорҳои мамлакат бо сабзавоту меваи тару тоза аз тамоми имконияту воситаҳо, аз ҷумла рӯзҳои мусоиди баҳорӣ пурсамар истифода бурда шавад.
Эмомалӣ Раҳмон таваҷҷӯҳи роҳбарони зикршударо ба зарурияти тақвияти фаъолияти гурӯҳҳои таблиғотӣ ва беҳтар сохтани шарҳу тавзеҳи мазмуну моҳияти тағйиру иловаҳои ба Конститутсияи (Сарқонун) Ҷумҳурии Тоҷикистон пешниҳодшуда ҷалб намуда, таъкид кард, ки барои таъмини иштироки озодонаи шаҳрвандон дар райпурсии умумихалқӣ тамоми тадбирҳои зарурӣ андешида шавад.