23 май Президенти Ҷумҳурии Тоҷикистон Эмомалӣ Раҳмон ҷавонони кишварро ба муносибати идашон- Рӯзи ҷавонон табрик намуд.

Дар табрикот омадааст, ки "Инак панҷ сол мешавад, ки дар Тоҷикистони озоду соҳибистиқлоли мо рӯзи 23 май ҳамчун Рӯзи ҷавонон таҷлил мегардад. Ба ин муносибат ҳамаи Шумоён ҷавонписарону ҷавондухтарони кишвари азизамонро табрик мегӯям.

Ҷавонон ҳамчун қувваи бузург ва нерӯи офаранда аз ибтидои давраи истиқлолияти давлатии Тоҷикистон, ки ба айёми ниҳоят вазнину сарнавиштсоз рост омад, то имрӯз, ки мардуми мо бо роҳи бунёдкориву ободонии сарзамини куҳанбунёдамон устуворона пеш рафта истодааст, дар тамоми соҳаҳои ҳаёти ҷомеа нақши барҷаста ва пештозро бозиданд.

Итминон дорам, ки шумо бо эҳсоси гарми ватандӯстӣ, ифтихори миллӣ, донишу малакаи муосир, забондонӣ ва хислатҳои ҳамидае, ки хоси миллати қадимаи мо мебошад, ояндаи Тоҷикистонро ба ҷомеаи башар ба таври шоиста муаррифӣ мекунед"- омадааст дар паёми табрикии Президенти Ҷумҳурии Тоҷикистон.