25 июл Президенти Ҷумҳурии Тоҷикистон Эмомалӣ Раҳмон бо ноиби аввали Раис, вазири мудофиаи Ҳукумати интиқолии Афғонистон Муҳаммадқосим Фаҳим мулоқот кард.

Зимни мулоқот мавзӯоти марбут ба муносибатҳои дуҷонибаи миёни Тоҷикистону Афғонистон, аз ҷумла ҳолат ва дурнамои рушди минбаъдаи ҳамкориҳои миёни ду кишвар дар бахшҳои гуногун мавриди баррасӣ қарор гирифт.

Дар вохӯрӣ таваҷҷӯҳи асосӣ ба масоили тақвияти робитаҳо дар муборизаи муштарак алайҳи гардиши ғайриқонунии маводи мухаддир, ҳамдастӣ дар таҳкими ҳифзи сарҳадот, ҳамкориҳо дар соҳаи тарбияи мутахассисин, бунёди иншооти нақлиётӣ ва ҳамлу нақл, инчунин дигар мавзӯот равона гардид.

Ҷонибҳо ба масъалаи эҳёи баъдиҷангии иқтисодиёти Афғонистон ва нақши Тоҷикистон дар ин раванд, ба шумули иқдомоти ҶТ дар роҳи интиқоли кӯмакҳои ҷомеаи башарӣ ба воситаи қаламраваш ба Афғонистони ҳамсоя дахл намуданд.