30 июл таҳти раёсати Президенти Ҷумҳурии Тоҷикистон Эмомалӣ Раҳмон маҷлиси навбатии ҳукумати мамлакат баргузор гардид.
Дар маҷлис қариб 30 масъала, аз ҷумла масъалаи кадрҳо баррасӣ гардиданд.
Иштирокчиёни маҷлис ҳамчун масъалаи аввалиндараҷаи рӯзнома - масъалаи тараққиёти соҳаи нақлиёти автомобилӣ, аз ҷумла сохтмону тармими роҳҳои мошингарди ҷумҳурӣ ва тартиби танзими ҳамлу нақли байналмилалии автомобилиро дар Ҷумҳурии Тоҷикистон мавриди баррасӣ қарор доданд.
Аъзои ҳукумат дар маҷлис лоиҳаи Созишномаи байниҳукуматии Тоҷикистону Фаронсаро дар бораи ҳамкории фарҳангӣ ва илмию техникӣ ва Созишномаи байниҳукуматии Тоҷикистону Украинаро дар бораи ҳамкорӣ дар мубориза ба муқобили хариду фурӯши ғайриқонунии маводи нашъадор, моддаҳои фалаҷкунандаи асаб ва ашёи хоми онҳоро тасдиқ карданд.
Дар маҷлис ҳамчунин масъалаҳои соҳаи фарҳангу маънавиёт ва дигар масъалаҳои муҳими марбут ба тарақиёти иқтисодии мамлакат дар нимаи аввали соли 2004 мавриди баррасӣ қарор гирифт.