11 сентябр Президенти Ҷумҳурии Тоҷикистон Эмомалӣ Раҳмон қабл аз парвоз ба Душанбе дар шаҳри Хуҷанд бо роҳбарони вилоят ва шаҳру ноҳияҳои он машварат кард.
Дар машварат масъалаҳои умдаи ҳаёти кишвар баррасӣ шуданд. Сарвари давлат дар назди масъулони вилоят вазифа гузошт, ки суръати ҷамъоварии пахтаро вусъат бахшанд ва дар ин кор тамоми қувваро сафарбар созанд.
Президенти ҷумҳурӣ таваҷҷӯҳи иштирокчиёни машваратро ба масъалаи ғунучини тамоми навъҳои зироат, омодагии ҳамаҷониба ба мавсими зимистонгузаронӣ, таъмини мактабҳо бо компютерҳо ва вусъати омодагиҳо ба таҷлили ҷашни 10-солагии Иҷлосияи 16-уми Шӯрои Олии Ҷумҳурии Тоҷикистон ҷалб сохт.
Баъди анҷоми сафари корӣ Президенти Ҷумҳурии Тоҷикистон шоми 11 сентябр ба Душанбе баргашт.