6 декабр дар Қасри Елисей дар Париж музокироти Президенти Ҷумҳурии Тоҷикистон Эмомалӣ Раҳмон ва Президенти Ҷумҳурии Фаронса Жак Ширак баргузор гардид.
Зимни мулоқоти "як ба як" сарони давлатҳо маҷмӯи масъалаҳои муносибатҳои дуҷонибаро баррасӣ намуданд. Қайд карда шуд, ки ҳоло ҳамаи шароит барои инкишофи онҳо, аз ҷумла наздикии мавқеъҳои ду давлат нисбати проблемаҳои рӯзмарраи байналмилалӣ, мубориза бар зидди терроризм ва гардиши ғайриқонунии маводи мухаддир ва як қатор омилҳои дигар вуҷуд доранд.
Дар ҷараёни музокирот сарони давлатҳо оид ба проблемаҳои минтақавӣ ва байналмилалӣ ба таври самарабахш мубодилаи афкор карданд. Дар ин робита ба вазъи Афғонистон ва барқарорсозии баъдиҷангии он таваҷҷӯҳи калон зоҳир карда шуд.