17 июл Президенти Ҷумҳурии Тоҷикистон Эмомалӣ Раҳмон ба Вилояти Мухтори Кӯҳистони Бадахшон сафари корӣ анҷом дод.
Эмомалӣ Раҳмон дар шаҳри Хоруғ ҳангоми ташриф ба осорхонаи таърихиву кишваршиносии вилоятии ба номи Қирғизбек Хушқадамов, дар кӯча бо аҳолӣ, ки ба истиқболи ӯ ҷамъ омада буданд, вохӯрии ғайрирасмӣ доир намуд. Сӯҳбат дар атрофи вазъи имрӯзаи сиёсӣ, иҷтимоӣ ва иқтисодии вилоят, мушкилоти зиндагӣ, роҳҳои бартараф кардани онҳо, дурнамои рушди иқтисодии минтақа ва нақшаҳои Ҳукумати Ҷумҳурии Тоҷикистон оид ба амалӣ намудани онҳо сурат гирифт.
Эмомалӣ Раҳмон бо экспонатҳои осорхона шинос гардида, дар бобати беҳтар ба роҳ мондани фаъолияти муассисаҳои фарҳангӣ, осорхонаҳо, ёдгориҳои таърихӣ, аз ҷумла дар Вилояти Мухтори Кӯҳистони Бадахшон мулоҳизаҳояшро баён намуд. Бо супориши Сарвари давлат қарор қабул гардид, ки барои тармими осорхонаи вилоятии ба номи Қирғизбек Хушқадамов 50 ҳазор сомонӣ ҷудо карда шавад.