Президенти Ҷумҳурии Тоҷикистон

Ифтитоҳи коргоҳи нави ҳасиббарории ҶДММ "Ширкати Азизӣ" ва муаррифии фермаи парандапарварии "Дӯсти Азиз" дар ноҳияи Бобоҷон Ғафуров

02.07.2020 08:54, ноҳияи Бобоҷон Ғафуров

2 июли соли 2020 Асосогузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ноҳияи Бобоҷон Ғафуров коргоҳи нави ҳасиббарории Ҷамъияти дорои масъулияти маҳдуди "Ширкати Азизӣ"-ро мавриди истифода қарор доданд.

Корҳои сохтмонӣ дар ин иншоот соли 2018 оғоз гардида, дар муддати кӯтоҳ ва бо сифати баланд анҷом дода шудааст. Корхонаи ҳасиббарорӣ аз 1 бинои асосӣ, 4 бинои ёрирасон ва ошхона иборат буда, аз ҷониби соҳибкори ватанӣ Абдуаҳад Самадзода бунёд гардидааст.

Бо ба истифода додани коргоҳи ҳасиббарории Ҷамъияти дорои масъулияти маҳдуди "Ширкати Азизӣ" 32 нафар бо кор ва маоши хуб таъмин гардиданд. Маврид ба зикр аст, ки пеш аз оғози кор, мутахассисон аз курсҳои омӯзишии кӯтоҳмуддат гузаронида шуда, нозукиҳои фаъолият дар чунин коргоҳҳоро аз худ мекунанд.

Аснои боздид Сарвари давлат муҳтарам Эмомалӣ Раҳмон ба иқдоми соҳибкор баҳои баланд дода, ташкили коргоҳро дар коҳиш додани маҳсулоти воридотӣ муҳим арзёбӣ намуданд. Иттилоъ дода шуд, ки дар ноҳияи Бобоҷон Ғафуров то ҷашни 30-юмин солгарди Истиқлолияти давлатии Ҷумҳурии Тоҷикистон бунёди беш аз 20 корхонаи саноатӣ ба нақша гирифта шудааст, ки то имрӯз 8 адади он мавриди истифода қарор гирифтааст. Коргоҳи мазкур низ аз ҷумлаи иншооти ҷашнӣ ба ҳисоб рафта, иқтидори истеҳсолии он дар як шабонарӯз аз 800 то 1000 килограмм маҳсулотро ташкил медиҳад. Корхона бо маҳсулоти нотайёри дохилӣ айни ҳол 40 навъи ҳасиб истеҳсол менамояд.

Бояд зикр намуд, ки ширкати мазкур ба бозори истеҳсоли ҳасиби Тоҷикистон аз соли 2015 ворид шуда, дар ин муддат бо истеҳсоли маҳсулоти хушсифат ва рақобатпазир тавонист дар бозор мавқеи худро пайдо намояд. Махсусан пас аз он ки Ҳукумати Ҷумҳурии Тоҷикистон дар соҳаи парандапарварӣ як қатор имтиёзҳои андозиву гумрукӣ муқаррар намуд, фаъолияти ин ширкат низ чун дигар корхонаҳои ин соҳаи зудрасу сердаромад тақвият ёфт. Аз ҷумла барои бо нархи дастрас таъмин намудани истеҳсолоти дохилӣ бо ашёи хом, яъне гӯшти мурғ, моҳи марти соли равон дар ҳудуди ноҳияи Бобоҷон Ғафуров як фермаи парвариши мурғи гӯштиро фаъол гардониданд. Ин имкон медиҳад, ки коргоҳи ҳасиббарорӣ дар ҳамаи фаслҳои сол бо ашёи хом таъмин бошад.

Дар доираи дастгириҳои давлатӣ ва бо истифода аз имтиёзҳои муқарраргардида, масъулони ин ширкати истеҳсолӣ ҳамчунин фабрикаи парвариши мурғи тухмдеҳро низ ба истифода доданд. Акнун пас аз ба тухм даромадани чӯҷаҳо, як қисми маҳсулот барои истеҳсоли ҳасиб истифода мешавад, қисми дигарашро ба бозори истеъмолӣ мебароранд.

Маҳсулоти тайёри корхона дар минтақаҳои гуногуни кишвар, аз ҷумла шаҳру ноҳияҳои вилояти Суғд ва шаҳри Душанбе харидорони зиёд дорад. Масъулон дар оянда нақша доранд, ки бо баланд бардоштани сифати маҳсулот, ба бозорҳои хориҷӣ низ роҳ ёбанд.

facebook
twitter
 
Идома
 
Идома
Идома
Нома ба президент
Мувофиқи талаботи моддаи 21 Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» муроҷиатҳое, ки дар онҳо насаб, ном, номи падари шахси воқеӣ, маълумот дар бораи суроғаи маҳалли истиқомат ё номи пурраи шахси ҳуқуқӣ ва суроғаи маҳалли ҷойгиршавии он зикр нашудаанд ё хато нишон дода шудаанд, инчунин бе имзо (имзои электронии рақамӣ) пешниҳод шудаанд, муроҷиатҳои беном дониста шуда, мавриди баррасӣ қарор намегиранд, агар онҳо дорои маълумот оид ба тайёрӣ барои содир кардани ҷиноят ё ҷинояти содиршуда набошанд.
Image CAPTCHA
Харита
© Хадамоти матбуоти Президенти Тоҷикистон
Тел/Факс.: (+992 37)2212520