Президенти Ҷумҳурии Тоҷикистон

Ифтитоҳи Корхонаи заргарии “Зари Суғд”-и КВД “Фулузоти нодири Тоҷикистон” дар шаҳри Бӯстон

08.02.2022 09:49, шаҳри Бӯстон
Ифтитоҳи Корхонаи заргарии “Зари Суғд”-и КВД “Фулузоти нодири Тоҷикистон” дар шаҳри Бӯстон  08.02.2022

8 феврал Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шаҳри Бӯстон Корхонаи заргарии “Зари Суғд”-ро баъд аз таъмиру азнавсозӣ мавриди баҳрабардорӣ қарор доданд.

Коргоҳ зертобеи Корхонаи воҳиди давлатии “Фулузоти нодири Тоҷикистон” буда, солиёни зиёд куҳнаву фарсуда ва бекор буд. Пас аз эълони иқдоми саноатикунонии босуръати мамлакат чун ҳадафи чоруми стратегӣ “Зари Суғд” ба пуррагӣ навсозӣ гардида, барои истеҳсоли маҳсулоти аълосифат бо дастгоҳҳои насли нави корӣ таъмин карда шуд.

Сарвари давлат муҳтарам Эмомалӣ Раҳмон аз сехҳои истеҳсолии коргоҳ дидан намуда, бо коргарони он суҳбати самимӣ анҷом доданд.

Иттилоъ дода шуд, ки дар навбати аввал корхона дар ҳаҷми то 50 миллион сомонӣ дар як сол маҳсулот истеҳсол менамояд ва ин нишондод тибқи нақша дар солҳои баъдӣ ба 100 миллион сомонӣ расонида мешавад. “Зари Суғд” истеҳсоли маҳсулоти заргарӣ, армуғонҳои гуногун, нишонҳои сарисинагӣ, нимпайкара, қолабҳои гуногуни металиро роҳандозӣ намудааст ва инчунин аз  сангҳои ороишӣ туҳфаву армуғон омода месозад.

Тамоми дастгоҳу таҷҳизоте, ки дар доираи корҳои навсозӣ дар корхона  насб гаридааст, истеҳсоли Туркия ва Федератсияи Русия буда, чунин шароит имконият медиҳад, ки маҳсулоти ниҳоӣ бо сифати баланд омода гардад.

Дар ҳудуди корхона сехҳои заргарӣ, зарҳалкорӣ, қолабомодакунӣ,  сехи механикӣ ва анбори алоҳидаи нигоҳдории маҳсулоти тайёр ташкил гардида, дар маҷмуъ 30 нафар аз сокинон соҳиби ҷои кори доимӣ гардидаанд. Дар корхона асосан хатмкардаҳои Донишкадаи  кӯҳию  металлургии Тоҷикистон,  ки дар шаҳри Бӯстон фаъолият менамояд, ба кор ҷалб шудаанд.       

Корхонаи заргарии “Зари Суғд” ба пуррагӣ бо ашёи хоми маҳаллӣ  фаъолият намуда, маҳсулоти ивазкунандаи воридотро ба бозорҳои мамлакат пешниҳод менамояд. Инчунин коргарон мақсад доранд, ки маснуоти заргарии истеҳсолнамудаи корхона ва маҳсулоти аз сангҳои ороишӣ омодагаштаи “Зари Суғд”-ро дар навбати аввал ба кишварҳои ҳамсоя содирот намоянд.

Сарвари давлат муҳтарам Эмомалӣ Раҳмон аз мағозаи корхонаи мазкур дидан намуда, бо маҳсулоти ниҳоии он шинос шуданд.

Президенти Ҷумҳурии Тоҷикистон муҳтарам Эмомалӣ Раҳмон  зимни боздид масъулинро вазифадор намуданд, ки бо дарназардошти талаботи бозори дохилӣ ва хориҷӣ истеҳсолотро ба роҳ монда, ба сифати маҳсулоти ниҳоӣ ва рақобатпазир будани он таваҷҷуҳи хоса зоҳир намоянд.

Дар ҳамин ҷо ба Президенти Ҷумҳурии Тоҷикистон муҳтарам Эмомалӣ Раҳмон лоиҳаи навсозии корхонаҳои Ҷамъияти дорои масъулияти маҳдуди “Фулузоти нодири Тоҷикистон” муаррифӣ карда шуд.

Иброз гардид, ки то соли 2026 навсозӣ дар тамоми корхонаҳои саноатии ҷамъияти мазкур дар назар дошта шудааст. Бояд гуфт, ки “Фулузоти нодири Тоҷикистон” дар тавозуни худ 7 корхонаи истеҳсолӣ дорад ва аллакай корхонаи “Хуҷанд - Зил” барои муҷаҳҳазсозии нақлиёти соҳавӣ ба кор шурӯъ намуд.

Зимни муаррифӣ иттилоъ дода шуд, ки корхона айни замон метавонад нақлиёти ёрии таъҷилӣ, нақлиёти махсус барои кормандони милитсия, нақлиёти обкашонӣ ва коммуналиро дар заминаи мошинҳои гуногун навсозӣ намуда, мутобиқ ба талаботи ҷорӣ ба сохторҳои дахлдор пешниҳод намояд. Қисмҳои иловагӣ, ки дар нақлиёти соҳавӣ насб мегардад, истеҳсоли худи корхонаи “Хуҷанд - Зил” мебошад.

Соли ҷорӣ бояд дар корхонаи “Гидрометаллургия” бо гузаронидани корҳои навсозӣ истеҳсоли қисмҳои эҳтиётӣ барои таҷҳизоти кӯҳкорӣ ва мелиоратсия роҳандозӣ шуда, дар корхонаи “Хуҷанд-Зил” қисмати рехтагарӣ пурра таъмиру муҷаҳҳаз карда шавад.   

Ҳадаф аст, ки бо баланд бардоштани иқтидори истеҳсолӣ минбаъд ҳам ҳаҷми маҳсулоти ватанӣ афзоиш дода мешавад ва ҳам  шумораи ҷойҳои кории доимӣ зиёдтар мегардад.

Зимни муаррифӣ иброз гардид, ки  КВД “Фулузоти нодири Тоҷикистон” дар баробари навсозӣ, ҳамчунин дар анҷоми корҳои ободонӣ низ саҳмгузор мебошад. 

Бо саҳми Мақомоти иҷроияи маҳаллии ҳокимияти давлатии вилояти Суғд наздик ба 1,5 километр роҳи дохилии шаҳри Бӯстон пурра мумфаршу навсозӣ гардид, ки дар доираи тадбирҳои навсозӣ чароғонкунии роҳ ва насби канорасангҳо бо маблағгузории  КВД “Фулузоти нодири Тоҷикистон” сомон ёфта, мувофиқ ба талаботи ҷорӣ мавриди истифода қарор дода шуд.

Роҳбари давлат муҳтарам Эмомалӣ Раҳмон масъулинро вазифадор намуданд, ки нақшаи пешбинигаридаро саривақт ва мутобиқ ба стандартҳои байналмилалӣ иҷро намуда, дар рушди саноати кишвар ҳиссагузорӣ намоянд. 

facebook
twitter
 
Идома
 
Идома
Идома
Нома ба президент
Мувофиқи талаботи моддаи 21 Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» муроҷиатҳое, ки дар онҳо насаб, ном, номи падари шахси воқеӣ, маълумот дар бораи суроғаи маҳалли истиқомат ё номи пурраи шахси ҳуқуқӣ ва суроғаи маҳалли ҷойгиршавии он зикр нашудаанд ё хато нишон дода шудаанд, инчунин бе имзо (имзои электронии рақамӣ) пешниҳод шудаанд, муроҷиатҳои беном дониста шуда, мавриди баррасӣ қарор намегиранд, агар онҳо дорои маълумот оид ба тайёрӣ барои содир кардани ҷиноят ё ҷинояти содиршуда набошанд.
Image CAPTCHA
Харита
© Хадамоти матбуоти Президенти Тоҷикистон
Тел/Факс.: (+992 37)2212520