Шоми имрӯз Президенти Ҷумҳурии Яман Алӣ Абдулло Солеҳ бо сафари расмӣ ба Тоҷикистон ташриф овард.
Маросими истиқболи расмии меҳмони олимақом дар фурӯдгоҳи шаҳри Душанбе баргузор гашт.
Президенти Ҷумҳурии Яман Алӣ Абдулло Солеҳро Сарвари давлати Тоҷикистон Эмомалӣ Раҳмон истиқбол гирифта, ба болои минбари ифтихорӣ даъват намуд.
Маросими истиқболи расмии Президенти Ҷумҳурии Яман бо садо додани сурудҳои миллии ду давлат, гузориши фармондеҳи Горди ифтихории Тоҷикистон, гузаштан аз назди ҷузъу томҳои он, эҳтиром овардан ҷониби Парчами давлатии Тоҷикистон ва шиносоӣ бо ҳайатҳои расмии ҳарду ҷониб ҷараён гирифт.
Масоили ҳамкории Тоҷикистону Яман пагоҳ зимни мулоқоти хосаи сарони ду давлат ва музокироти васеъ бо иштироки ҳайатҳои расмии ҳарду ҷониб баррасӣ мегардад.
Аз рӯйи натиҷаи мулоқотҳо ба имзо расадани якчанд санади нави ҳамкорӣ ва нишасти матбуотии сарони ду давлат дар назар аст.
Хотиррасон мекунем, ки 4 санади дигари ҳамкорӣ дар соҳаҳои иқтисод, илму техника, фарҳанг, маориф ва машваратҳои сиёсӣ зимни сафари расмии Президенти Ҷумҳурии Тоҷикистон Эмомалӣ Раҳмон ба Ҷумҳурии Яман моҳи декабри соли гузашта ба имзо расида буд, ки ин заминаи нахустини сиёсӣ ва қарордодию ҳуқуқуқӣ барои густариши муносибатҳои мутақобилан судманди Тоҷикистону Яман гашта буд.