Субҳи рӯзи 22 феврал Сарвари давлати Тоҷикистон Эмомалӣ Раҳмон ҳамчунин бо Президенти Украина Виктор Ющенко мулоқот намуд.
Сарвари давлати Тоҷикистон ба роҳбари давлати Украина барои таъҷилан ба кӯмаки кишвари мо баҳри бартарафсозии вазъи ногувори энергетикӣ рӯ оварданаш арзи сипосу миннатдорӣ кард.
Виктор Ющенко дар навбати худ изҳор дошт, ки вобаста ба эҳтиёҷоти имрӯзаи Тоҷикистон Украина омода аст, ба зудӣ кӯмаки зарурии башардӯстона ирсол намояд.
Эмомалӣ Раҳмон ва Виктор Ющенко атрофи масоили ҳамкориҳои дуҷониба ва бисёрҷонибаи Тоҷикистону Украина гуфтугӯи судманд анҷом доданд.
Таваҷҷӯҳи махсус ба ҷоннок намудани фаъолияти комиссияи муштараки ҳамкориҳои иқтисодӣ баҳри рушди робитаҳо дар соҳаҳои саноати сабуку хӯрокворӣ, аз ҷумла коркарди нахи пахта ва меваю сабзавот, истихроҷ ва коркарди канданиҳои фоиданоки зеризаминӣ ва ҳамчунин дар соҳаҳои туризм, фарҳанг ва илму маориф зоҳир гардид.
Ҷонибҳо баҳри рушди ҳамкориҳои гуногунҷанба, аз ҷумла бунёди корхонаҳои муштараки саноатӣ ва афзоиш додани мубодилаи молу маҳсулоти ду кишвар изҳори ҳавасмандӣ карданд.