Дар шаҳри Сочии Федератсияи Россия Президенти Ҷумҳурии Тоҷикистон Эмомалӣ Раҳмонов бо Президенти Федератсияи Россия Владимир Путин мулоқоти як бо як анҷом дод.

Дар ҷараёни сӯҳбати доманадору пурмӯҳтаво маҷмӯи васеи масъалаҳои ҳамкориҳои дуҷонибаи Тоҷикистону Россия баррасӣ шуданд. Президенти Ҷумҳурии Тоҷикистон Эмомалӣ Раҳмонов ва Президенти Федератсияи Россия Владимир Путин ба рушди муносибатҳои ба ҳарду тараф манфиатноки ҳамкорӣ дар соҳаҳои гидроэнергетика ва истихроҷи гази табиии Тоҷикистон таваҷҷӯҳи махсус зоҳир карданд.

Дар мулоқот аз густариши робитаҳои иқтисодию тиҷоратии Ҷумҳурии Тоҷикистон бо Федератсияи Россия изҳори қаноатмандӣ карда шуд.

Ҳамчунин атрофи масоили минтақавӣ аз ҷумла раванди барқарорсозии Афғонистон, мубориза бар зидди гардиши ғайриқонунии маводи мухаддир, терроризм ва экстремизм табодули назар карда шуд.