7 май дар арафаи таҷлили 59-умин солгарди Иди ғалаба бо имзои Президенти Ҷумҳурии Тоҷикистон Эмомалӣ Раҳмон боз як амри башардӯстона ба тасвиб расид. Дар асоси он ба Ҳукумати Ҷумҳурии Тоҷикистон супорида шудааст, ки ҷиҳати ба иштирокчиёну маъюбони ҶБВ солҳои 1941 – 1945 ва ҳамсарони бесаробонмондаи ҷанговарони дар ин ҷанг ҳалокгардида аз ҳисоби маблағҳои буҷети ҷумҳуриявӣ ва фонди ҳифзи иҷтимоии аҳолии Ҷумҳурии Тоҷикистон пардохти кӯмакпулии яквақта ба андозаи 100 сомонӣ ба ҳар як нафар ҷудо намояд.
Иди ғалабаи бузург дар ҶБВ собитгари иттиҳоду ҳамбастагии халқҳои дӯсту бародар, хизматҳои беназиру таърихӣ, пирузии нерӯҳои солиму озодихоҳ бар қувваҳои истилогари фашистӣ мебошад.
Президенти Ҷумҳурии Тоҷикистон Эмомалӣ Раҳмон эҳтирому қадрдонии собиқадорони ҷангу меҳнатро дар сатҳи олӣ ба ҷо оварда, ҷиҳати баланд бардоштани мақому эътибори онҳо, таъминоти иҷтимоӣ ва дастгирии моддию маънавиашон тадбирҳои неку ҳавасмандиҳои башардӯстона андешид.
Дар асоси фармон ва дастуру супоришҳои Президенти Ҷумҳурии Тоҷикистон Эмомалӣ Раҳмон ҳар сол қабл аз ҳама нафақаи иштирокчиёни ҶБВ баланд бардошта шуда, масъалаи сари вақту бетаъхир ба онҳо расонидани маблағ таҳти назорати шахсии Сарвари давлат қарор дорад.
Ҳар сол дар арафаи иди Ғалаба ба ҳар як иштирокчии ҶБВ маблағҳои муайяни яквақта ва тӯҳфаҳои хотиравӣ тақдим карда мешавад. Ҳамзамон бо ифодаи дастгирӣ аз иқдоми хайрхоҳонаи Президенти мамлакат Эмомалӣ Раҳмон доираи мухталифи истеҳсолию соҳибкорӣ, ширкату муассисаҳои давлатию ғайридавлатӣ ба собиқ кормандони соҳа ва собиқадорони ҷангу меҳнати шаҳру ноҳияи худ мадад мерасонанд. Иштирокчиёни ҶБВ дар асоси амри Сарвари давлат аз пардохти тамоми намудҳои хизмати коммуналӣ озод буда, дар гирифтани замин имтиёз доранд.
Бешубҳа, ин иқдоми навбатии Сарвари давлат бори дигар аз ғамхорию арҷгузории роҳбарияти олимақоми мамлакат ба собиқадорони ҷангу меҳнати ҷумҳурӣ башорат медиҳад.