24 март Президенти Ҷумҳурии Тоҷикистон Эмомалӣ Раҳмон бо Комиссари олии Созмони амнияту ҳамкории Аврупо дар масъалаи ақаллиятҳои миллӣ Ролӣ Экеус мулоқот кард.

- "Мо ба нақши комиссари олии САҲА дар масъалаи ақаллиятҳои миллӣ барои амалӣ сохтани  дипломатияи пешгирикунандаи  самарабахш баҳои баланд медиҳем", - гуфт Эмомалӣ Раҳмон.

Дар ҷараёни сӯҳбат таъкид шуд, ки дар Тоҷикистон дар сатҳи ҳукумат барои амалӣ сохтан ва ҳимоя кардани ҳуқуқи  ақаллиятҳои  миллӣ ягон монеа вуҷуд надорад. Вазъи  мураккаби иҷтимоию иқтисодии давраи гузариш, ки мамлакат аз сар мегузаронад, ҷараёни муҳоҷирати аҳолиро хусусан дар солҳои аввали мустақилияти давлат тақвият бахшид, аммо имрӯз тамоюли мазкур дар сатҳи барои ҳар мамлакат муқаррарӣ идома дорад.

Зикр шуд, ки Тоҷикистон иштирокчии фаъоли аҳдномаҳои ҳуқуқ ва озодии ақаллиятҳои миллӣ мебошад. Аҳдномаи мазкур дар доираи ИДМ қабул карда шудааст.

- "Мо солҳои душвори муқовимати дохилиро аз сар гузаронда, муттаҳид сохтани тамоми ҷамъиятро дастоварди асосии худ мешуморем ва барои таҳкими он тамоми тадбирҳоро меандешем", - гуфт Президенти Ҷумҳурии Тоҷикистон.

Мусоҳибон қайд карданд, ки ақаллиятҳои миллӣ дар маҳалҳои зисти худ ба гирифтани маълумот бо забони модарӣ имконияти воқеӣ доранд.

Эмомалӣ Раҳмон хабар дод, ки аз ҷумлаи намояндагони мақомоти гуногуни давлатӣ гурӯҳи махсуси корӣ ташкил дода шудааст.  Намояндагони ҷамъиятҳои ақаллиятҳои миллӣ бо гурӯҳи  мазкур дар тартибу таҳияи Барномаи давлатии сиёсати миллӣ бевосита ва фаъолона кумак мерасонанд.

"Лоиҳаи барнома дар айни ҳол муҳокима карда мешавад ва дар он намояндагони САҲА низ ширкат доранд", - изҳор намуд Президенти Ҷумҳурии Тоҷикистон Эмомалӣ Раҳмон.