29 март дар бӯстонсарои ҳукуматӣ таҳти раёсати Президенти Ҷумҳурии Тоҷикистон Эмомалӣ Раҳмон ҷаласаи корӣ баргузор шуд.

Дар ҷаласа аъзои Ҳукумат, роҳбарони як қатор идораҳои ҷумҳуриявӣ ва кормандони Дастгоҳи иҷроияи Президенти Ҷумҳурии Тоҷикистон иштирок доштанд.

Сарвари давлат аз самтҳои асосии сиёсати дохилӣ ва хориҷии  Ҳукумати Ҷумҳурии Тоҷикистон ёдовар шуда, диққати масъулинро ба татбиқи амалии фармону қарор ва барномаҳои давлатии рушди иқтисодию иҷтимоии ҷомеа ҷалб кард.

"Вазифаи  муҳимтарини Ҳукумат идомаи муваффақонаи ислоҳоти иқтисодӣ, ки ба паст кардани сатҳи камбизоатӣ ва болоравии иқтисодиёт равона шудааст,  инчунин ислоҳоти низоми идораи давлатӣ бо мақсади ҷалби сармоягузорӣ, рушди бахши ғайридавлатӣ, вусъати хусусигардонӣ ва густариши ислоҳоти бонкӣ мебошад", - таъкид намуд Президенти Ҷумҳурии Тоҷикистон Эмомалӣ Раҳмон.

"Зарурати таҳия ва қабули Қонуни Ҷумҳурии Тоҷикистон  "Дар бораи соҳибкории хурду миёна" пеш омадааст", - афзуд Сарвари давлат, - зеро манбаи асосии рушди ҷомеаро фаъолияти самарабахши соҳибкорони ватанӣ ташкил медиҳад".

Ба масъалаи вусъат додани қарзҳои хурд дахл намуда, Президенти Ҷумҳурии Тоҷикистон Эмомалӣ Раҳмон роҳбарони вазорату идораҳои марбутаро ҷиҳати пешниҳоди ҳисоботи мушаххас дар бораи ҳаҷми қарзҳои додашуда ва манбаъҳои он вазифадор намуд.

Сарвари давлат супориш дод, ки баҳри таъмини саривақтии маошу  нафақа, кӯмак ба маъюбон ва иштирокчиёни Ҷанги Бузурги Ватанӣ, дастгирии ятимону бепарасторон, расонидани кӯмак ба мактаб-интернатҳо, баланд бардоштани  сифати  хизматрасониҳои тиббӣ, фароҳам овардани шароитҳои беҳтари таълиму тарбия, мубориза алайҳи ришвахӯрӣ, ба хусус дар соҳаи маориф, дастгирии сиёсати давлатии ҷавонон, такмили ихтисоси  кормандони соҳаҳои  мухталифи  хоҷагии халқи  кишвар ва ҷобаҷогузории кадрҳо бо ҷалби  мутахассисони варзидаи  дорои тафаккури  наву созанда, ташкили ҷойҳои нави корӣ тадбирҳои бетаъхир андешида шавад.

Самтҳои асосии сиёсати дохилӣ ва хориҷии Ҳукумати Ҷумҳурии Тоҷикистон  ва нияту нақшаҳои  Ҳукумат дар солҳои минбаъда ҳамчун барномаи мукаммали рушди иқтисодию иҷтимоии ҷомеа дар Паёми Сарвари давлат ба Маҷлиси Олии Ҷумҳурии Тоҷикистон рӯзи 16 апрел пешниҳод карда мешавад, - гуфт дар хатми ҷаласа Президенти Ҷумҳурии Тоҷикистон Эмомалӣ Раҳмон.