16 апрел Президенти Ҷумҳурии Тоҷикистон Эмомалӣ Раҳмон бо роҳбарони вазорату идораҳои ҷумҳуриявӣ, раиси Вилояти Мухтори Кӯҳистони Бадахшон, раисони вилоятҳо, шаҳру ноҳияҳо, роҳбарони мактабҳои олӣ, мушовирони давлатии Президент ва кормандони Дастгоҳи иҷроияи Президенти Ҷумҳурии Тоҷикистон машварати корӣ доир намуд.
Яке аз масъалаҳои асосии рӯзномаи машварати корӣ таҳлили вазъи кунунии иқтисодию иҷтимоии кишвар, ҷараёни татбиқи қарору қонунҳои амалкунанда, дастуру супориш ва фармонҳои Президенти Ҷумҳурии Тоҷикистон буд.
Бо натиҷагирӣ аз ҳисоботи масъулин Президенти Ҷумҳурии Тоҷикистон Эмомалӣ Раҳмон бо далелҳои асоснок аз мавҷудияти ҳодисаҳои истифодаи ғайримақсадноки маблағҳои буҷети давлатӣ, ҳатто маблағҳои аз фонди эҳтиётии Сарвари давлат барои кӯмаку дастгирии эҳтиёҷмандону бепарасторон ҷудо гардида, изофанависӣ дар мавриди падохти нафақа ва ёрдампулиҳо, монеъагӣ ва роҳ додан ба қонуншиканӣ ҳангоми тақсими замин ба аҳолӣ, фишор ба хоҷагиҳои деҳқонӣ ва дигар шаклҳои нави хоҷагидорӣ, ришвахӯрӣ дар соҳаҳои маориф ва тандурустӣ изҳори нигаронӣ кард ва баҳри ислоҳи камбудиҳо сохторҳои марбутаро вазифадор сохт.
Президенти Ҷумҳурии Тоҷикистон Эмомалӣ Раҳмон ҷиҳати омодагӣ ва баргузории 15-умин солгарди Истиқлолияти давлатӣ таҳияи нақшаву чорабиниҳои вобаста ба соли тамаддуни ориёӣ, 2700-солагии шаҳри Кӯлоб ва Конфронси байналмилалӣ дар доираи Даҳсолаи байналмилалии амалиёти "Об барои ҳаёт" дастурҳои мушаххас дод.
Сарвари давлат ба масъулини Ҳукумати Ҷумҳурии Тоҷикистон аз бобати омодагӣ дар мавриди анҷоми муваффақонаи бунёди минтақаҳои роҳи Шоҳон-Зиғар, Шкев-Зиғар, нерӯгоҳи Помир-1, туннели Анзоб, кони гази Хоҷабоқирғон, масъалаҳои таъмини оби нӯшокии шаҳри Хуҷанд ва таҳияи нақшаи бунёди литсей - интернати Президентӣ барои ятимон бо назардошти тамоми имкониятҳои таҳсилу фароғат, истиқомат ва шароитҳои технологии сатҳи байналмилалӣ супоришҳои қатъӣ дод.