6 сентябр Президенти Ҷумҳурии Тоҷикистон Эмомалӣ Раҳмон роҳбари намояндагӣ ва ҳамоҳангсози доимии Барномаи рушди СММ дар Тоҷикистон Уилям Пейтонро бо хоҳиши ӯ ба ҳузур пазируфт.

Зимни мулоқот масъалаҳои марбут ба вазъияти ҳозира ва нақшаҳои густариши ҳамкории Ҷумҳурии Тоҷикистон бо Барномаи рушди СММ, аз ҷумла дар бобати тезонидани суръати таҳияи лоиҳаи Стратегияи рушди миллӣ муҳокима шуд, ки мақсади он мушарраф шудан ба Ҳадафҳои Рушди Ҳазорсола мебошад.

Мусоҳибон зикр карданд, ки Тоҷикистон аз ҷумлаи 7 мамлакатест, ки дар онҳо барномаи умумиҷаҳонии Ҳадафҳои Рушди Ҳазорсола амалӣ карда мешавад. Қайд карда шуд, ки Тоҷикистон дар муайян намудани эҳтиёҷот барои расидан ба Ҳадафҳои Рушди Ҳазорсола дар байни мамлакатҳои дигар пешсаф аст.

Ҳар ду ҷониб изҳор намуданд, ки ҳамкории самарабахши дуҷонибаи Ҷумҳурии Тоҷикистон ва Барномаи рушди СММ-ро ба манфиати тарафайн боз ҳам ривоҷ хоҳанд дод.

Эмомалӣ Раҳмон ва Уилям Пейтон атрофи масъалаҳои омодагӣ ба мулоқоти сарони давлатҳои узви СММ, ки моҳи сентябр дар Ню-Йорк баргузор мегардад, ва барномаи иштироки ҳайати Ҷумҳурии Тоҷикистон дар он табодули назар намуданд.