7 сентябр Президенти Ҷумҳурии Тоҷикистон Эмомалӣ Раҳмон бо ҳайати Бонки Осиёии Рушд -ҳайати мудирони иҷроияи он таҳти роҳбарии Пол Вилям Спелтс мулоқот кард. Дар мулоқот вазъи имрӯза ва дурнамои ҳамкориҳои ояндаи Тоҷикистон ва Бонки Осиёии Рушд муҳокима шуданд.

Эмомалӣ Раҳмон зикр намуд, ки сафари ҳайати бонки мазкур ба Тоҷикистон, ҳамчун иқдоми муҳимми равнақу ривоҷи ҳамкорӣ дар бобати боз ҳам бештар густариш додани муносибатҳои Тоҷикистон ва Бонки Осиёии Рушд баррасӣ карда мешавад. "Мо ҷидду ҷаҳди роҳбарияти бонкро дар ин бобат ҳамҷониба дастгирӣ менамоем", - гуфт Эмомалӣ Раҳмон.

Мусоҳибон қайд карданд, ки тадбирҳои Ҳукумати Тоҷикистон дар доираи барномаҳои ислоҳот ва рушд ба туфайли кӯмаку дастгирии муассисаҳои байналхалқии молиявӣ, аз ҷумла Бонки Осиёии Рушд, тӯли солҳои охир ба таъмини вазъияти босуботи макроиқтисодӣ ва пешрафти иқтисодии мамлакат имкон доданд.

Зимни мулоқот роҷеъ ба масъалаҳои зиёд кардани ҳаҷми маблағгузорӣ ба барномаҳои дар соҳаҳои энергетика ва нақлиёт таҳияшуда табодули назар карда шуд. Қайд гардид, ки ин барномаҳо аҳамияти калони минтақавӣ доранд.