25 октябр Президенти Ҷумҳурии Тоҷикистон Эмомалӣ Раҳмон аз Сафири нави Фавқулодда ва Мухтори Ҷумҳурии Словения дар Ҷумҳурии Тоҷикистон Андрей Бенедейчич эътимоднома қабул намуд.
Дар мулоқоти Сарвари давлати Тоҷикистон Эмомалӣ Раҳмон бо Сафири нави Фавқулодда ва Мухтори Ҷумҳурии Словения дар Ҷумҳурии Тоҷикистон Андрей Бенедейчич, ки пас аз маросими қабули этимоднома доир шуд, маҷмӯи васеи масоили ҷорӣ ва дурнамои ҳамкориҳои Тоҷикистону Словения муҳокима гаштанд.
Президенти Ҷумҳурии Тоҷикистон Эмомалӣ Раҳмон иброз дошт, ки Тоҷикистон ба масоили густариши ҳамкориҳо бо кишварҳои Аврупои Шарқӣ, аз ҷумла бо Словения таваҷҷӯҳи ҷиддӣ зоҳир мекунад.
Президенти Ҷумҳурии Тоҷикистон Эмомалӣ Раҳмон аз густариши муносибатҳо ва равобити мутақобилан судманд бо Ҷумҳурии Словения изҳори қаноатмандӣ намуда, натиҷаҳои сафари вазири корҳои хориҷии ин кишвар Димитр Рупелро, ки моҳи апрели соли равон ба ҳайси раиси Созмони Амният ва ҳамкории Аврупо бо гурӯҳи калони соҳибкорони Словения ба Тоҷикистон ташриф оварда буд, мусбату назаррас арзёбӣ кард.
Дар мулоқот оид ба ташкили заминаи ҳуқуқию шартномавии ҳамкориҳои минбаъда ва имкониятҳои васеи истеҳсолию саноатӣ, дурнамои рушди бемайлони иқтисодию иҷтимоии Тоҷикистон мубодилаи судманди афкор сурат гирифт.
Ҷонибҳо барои рушду нумӯи минбаъдаи ҳамкориҳои ду кишвар дар соҳаҳои гуногун изҳори омодагӣ намуданд.