27 октябр Президенти Ҷумҳурии Тоҷикистон Эмомалӣ Раҳмон аз Сафири нави Фавқулодда ва Мухтори Ирландия дар Тоҷикистон Ҷастин Ҳарман эътимоднома қабул намуд.
Дар мулоқоти Сарвари давлати Тоҷикистон Эмомалӣ Раҳмон бо Сафири нави Фавқулодда ва Мухтори Ирландия дар Тоҷикистон Ҷастин Ҳарман, ки баъди маросими қабули эътимоднома доир шуд, маҷмӯи васеи масоили муносибатҳои Тоҷикистону Ирландия мавриди баррасӣ қарор гирифт.
"Мо, - изҳор дошт Президенти Ҷумҳурии Тоҷикистон Эмомалӣ Раҳмон, - ба вазифаи сафир таъин шудани Шуморо ҳамчун нишони ҳавасмандии давлати Ирландия баҳри ба роҳ мондани ҳамкориҳои судманд бо Тоҷикистон қабул менамоем, - ва афзуд, ки дурии масофаи байни кишварҳои мо дар шароити имрӯзаи глобализатсия наметавонад садди роҳи робитаҳои ҳамкории мо гардад".
Дар мулоқот зикр гардид, ки дар шароити рушди бемайлони имрӯза ва ояндаи умедбахши иқтисодиёти Тоҷикистон ва дигаргуниҳои зиёди мусбӣ дар минтақаи Осиёи Марказӣ имкониятҳои васеи ҳамкориҳо дар соҳаи иқтисод ва савдо кушода мегарданд.