27 октябр Президенти Ҷумҳурии Тоҷикистон Эмомалӣ Раҳмон ҳамчунин аз Сафири нави Фавқулодда ва Мухтори Гурҷистон дар Тоҷикистон Давид Замсалианӣ эътимоднома қабул намуд.

Баъди маросими қабули эътимоднома Сарвари давлати Тоҷикистон Эмомалӣ Раҳмон бо Сафири нави Фавқулодда ва Мухтори Гурҷистон дар Тоҷикистон Давид Замсалианӣ мулоқот анҷом дод, ки дар ҷараёни он доираи васеи масоили ҳамкориҳои дуҷониба ва бисёрҷонибаи Тоҷикистону Гурҷистон муҳокима гаштанд.

"Тоҷикистон ба рушди ҳамкориҳо бо Гурҷистон манфиатдор аст, аз ин хотир мо ҷараёни воқеоти Гурҷистон ва атрофи онро пайваста мавриди омӯзиш қарор медиҳем", - изҳор дошт Сарвари давлат Эмомалӣ Раҳмон дар оғози суҳбат .

Дар мулоқот оид ба имконият ва роҳҳои барқарор намудани муносибатҳои қаблӣ ва ташкил намудани самтҳои нави ҳамкориҳои мутақобилан судманди Тоҷикистону Гурҷистон мубодилаи афкор сурат гирифт.

Қайд карда шуд, ки бо назардошти рушди босуръати иқтисодии ҳарду кишвар имкониятҳои ба роҳ мондани робитаҳои нави ҳамкорӣ зиёд мегарданд.

Ҷонибҳо таъкид доштанд, ки дар гузашта ҳамкориҳои ҷумҳуриҳои мо дар соҳаи фарҳанг ва илму маориф бисёр назаррас буд ва имрӯз барқарор ва густариш додани ин муносибатҳои анъанавӣ зарур аст.

Мусоҳибон барои эҷоди заминаи шартномавию ҳуқуқии ҳамкориҳои минбаъдаи Тоҷикистону Гурҷистон изҳори омодагӣ намуданд.