8 июн Президенти ҷумҳурӣ Эмомалӣ Раҳмон Сафири Фавқулодда ва Мухтори Британияи Кабир дар Ҷумҳурии Тоҷикистон ҷаноби Майкл Смитро бинобар анҷоми мӯҳлати ваколаташ ба ҳузур пазируфт.

Дар ҷараёни мулоқот масъалаҳои вобаста ба маҷмӯи муносибатҳо, аз ҷумла рушди ҳамкориҳои иқтисодии миёни Ҷумҳурии Тоҷикистон ва Британияи Кабир баррасӣ шуданд.

Президенти ҷумҳурӣ Эмомалӣ Раҳмон изҳор дошт, ки дар соҳаҳои иқтисодию тиҷоратӣ низ имкониятҳои истифоданашуда хеле зиёданд ва ба роҳ мондани онҳо ба болоравии сатҳи муносибати миёни Тоҷикистону Бритониё мусоидат хоҳад кард.

Эмомалӣ Раҳмон бо изҳори умеди комил аз густариши ҳамкориҳои дуҷониба афзуд, ки Тоҷикистон ҷонибдори ҳамагуна тадбирҳои ҷаҳонию минтақавӣ дар ҳалли мушкилоти вобаста ба мубориза алайҳи терроризму экстремизми байналхалқӣ ва гардиши ғайриқонунии маводи мухаддир мебошад.

Ҷонибҳо бобати инкишофи ҳамкориҳо дар соҳаҳои маорифу тандурустӣ, фарҳанг, туризм ва омӯзиши забони англисӣ низ табодули афкор намуданд.

Дар мулоқот ба дигар масъалаҳои дорои характери минтақавию ҷаҳонӣ низ дахл карда шуд.

Президенти ҷумҳурӣ Эмомалӣ Раҳмон ба дипломати Британияи Кабир Майкл Смит барои талошҳои устувор дар мавриди таҳкими муносиботи дуҷонибаи Тоҷикистону Британияи Кабир изҳори сипос ва орзӯи муваффақиятҳои нав намуд.