Бегоҳии рўз Президенти Ҷумҳурии Тоҷикистон Эмомалӣ Раҳмон Вазири нафт ва захираҳои табиии Ҷумҳурии Исломии Покистон Сайид Навид Қамарро, ки барои иштирок дар мулоқоти вазирони энергетикаи кишварҳои аъзои Созмони ҳамкориҳои иқтисодӣ ба шаҳри Душанбе ташриф овардааст, ба ҳузур пазируфт.
Дар мулоқот масоили ҳамкории рушдёбандаи Тоҷикистону Покистон баррасӣ шуд.
Аз мўҳтавои ҳамкории солҳои ахир ва пайвастагии робитаҳои сиёсии сатҳи олии ду кишвар изҳори қаноатмандӣ карда шуд.
Нақшаҳои муштараки минтақавӣ оид ба бунёди хатти баландшиддати интиқоли нерўи барқи КАСА 1000 ва роҳҳои оҳану мошингарди миёни ду кишвар маҳаки асосии ҳамкории бунёдии минбаъдаи Тоҷикистону Покистон маънидод гардид.
Ҳарду ҷониб омодагии устувори худро баҳри таҳким ва густариши муносибатҳои дўстӣ ва ҳамкории мутақобилан судманд таъкид намуданд.