Президенти Ҷумҳурии Тоҷикистон Эмомалӣ Раҳмон Вазири нерўи Ҷумҳурии Исломии Эрон Маҷид Номҷўро, ки барои иштирок дар ҷаласаи комиссияи байниҳукуматии ҳамкории дуҷониба ва мулоқоти вазирони энергетикаи кишварҳои аъзои Созмони ҳамкориҳои иқтисодӣ ба шаҳри Душанбе ташриф овардааст, ба ҳузур пазируфт.

Дар мулоқот масоили ҳамкории иқтисодӣ-тиҷоратии Тоҷикистону Эрон баррасӣ шуд.

Аз сатҳи ҳамкории дуҷониба дар маҷмўъ изҳори қаноатмандӣ карда шуд. ҳамзамон бо ин вусъати бештар ва хислати муназзам касб кардани ҳамкорӣ, аз ҷумла ҷараёни иҷрои саривақтии тавофуқоти сершумори дуҷониба дар соҳаҳои энергетика, инфрасохтори нақлиётӣ, ҳамлу нақли транзитӣ ва саноат матлуб дониста шуд.

Таъкид гардид, ки барои дар зимистони пешомад ба кор даровардани чархи якуми нерўгоҳи обии Сангтўда – 2 бояд аз тамоми имкону захираҳо истифода карда шавад.

Вусъат додани корҳо барои татбиқи амалии лоиҳаҳои минтақавии зербиноӣ оид ба пайванди роҳҳои оҳану мошингард ва хатҳои интиқоли барқи ду кишвар тавассути қаламрави Афғонистон аз самтҳои афзалиятноки ҳамкории ду кишвар арзёбӣ гардид.