Дар сўҳбат бо Мудири кулли Созмони исломии илму фарҳанг ва маориф (ИСЕСКО) Абдулазиз ибни Усмон Ат-твайҷирӣ аз ҳамкории густурдаи ин созмон бо сохторҳои дахлдори Тоҷикистон изҳори қаноатмандӣ карда шуд.

Сарвари давлат Эмомалӣ Раҳмон ба дастгирии соҳаҳои илм, маориф ва фарҳанги Тоҷикистон, ки дар самти эҳё ва ҳифзи ёдгориҳои таърихию фарҳангӣ, осори пурғановати хаттӣ, аз ҷумла дастхатҳои нодири бостонӣ ва ҳамчунин кўмак ба олимону омўзгорони тоҷик дар корҳои илмию таълимӣ ба назар мерасад, баҳои баланд дод.

Бо қаноатмандӣ зикр гардид, ки бо дастгирии молиявии ИСЕСКО баҳри омўзиш ва бозомўзии донишҷўён ва олимону омўзгорони тоҷик ва татбиқи корҳои илмию амалии онҳо дар дохил ва хориҷи кишвар тадбирҳои зиёд ба сомон расонда шудаанд.

Таъкид гардид, ки «пойтахти фарҳанги исломӣ» эълон шудани шаҳри Душанбе ба ҳамкории бештару босамари Тоҷикистон бо Созмони исломии илму фарҳанг ва маориф ва кишварҳои сершумори мусулмонии олам мусоидати фаъол хоҳад кард.