Дар Қасри Миллат Президенти мамлакат Эмомалӣ Раҳмон як қатор меҳмонони олимақомро, ки баҳри иштирок дар Иҷлосияи 37 – уми Вазирони корҳои хориҷии давлатҳои аъзои Созмони Конфронси Исломӣ ба Тоҷикистон ташриф овардаанд, ба ҳузур пазируфт.
Нахуст Сарвари давлат Эмомалӣ Раҳмон Президенти Бонки Исломии Рушд Аҳмад Муҳаммад Алиро ба ҳузур пазируфта, ин ниҳоди бонуфузи молиявии минтақавиро «яке аз шарикони асосии стратегии Тоҷикистон” арзёбӣ намуд.
Зикр гардид, ки тайи солҳои гузаштаи ҳамкорӣ аз ҷониби Бонки Исломии Рушд ба Тоҷикистон зиёда аз 180 млн. доллари амрикоӣ қарзҳои имтиёзнок ва 2,5 млн. доллари амрикоӣ грантҳо ва кўмаки техникӣ ҷудо гаштааст.
Доктор Аҳмад Муҳаммад Алӣ ба Сарвари давлат Эмомалӣ Раҳмон ва мардуми аз офатҳои пайдарпайи табиӣ зарардидаи Тоҷикистон, ба хусус аҳли хонавода ва наздикони шахсони талафёфта изҳори тасаллияту ҳамдардӣ карда, омодагии Бонки Исломии Рушдро баҳри расондани кўмакҳои башардўстона таъкид намуд. Ў аз ҷумла изҳор дошт, ки барои омўзиши ҳаҷми зарар ва кўмаки зарурӣ ба Тоҷикистон як гурўҳи кории Бонки Исломии Рушд фиристода мешавад ва таъкид дошт, ки “кўмак бештар ба кишоварзон расонда хоҳад шуд, то ки киштзорҳои зарардидаи онҳо барқарор карда шаванд”.
Зимни сўҳбат оид ба имконоти маблағгузории лоиҳаҳои стратегии Тоҷикиситон дар соҳаҳои гуногун, аз ҷумла сохтмони нерўгоҳҳои барқӣ, хатҳои интиқоли нерўи барқ, роҳу пулҳо, дастгирии соҳаи кишоварзӣ, саноат, маориф ва тандурустӣ гуфтугўйи судманд сурат гирифт.
Аҳмад Муҳаммад Алӣ изҳор дошт, ки “Бонки Исломии Рушд дар сармоягузории бунёди нерўгоҳҳои обии Тоҷикистон нақши намоён хоҳад дошт, зеро ин гуна нерўгоҳҳо манбаъи истеҳсоли нерўи арзон, таҷдидшаванда ва аз ҷиҳати экологӣ безарар мебошад”.
Ба ташкил ва густариши ҳамкорӣ бо дигар аъзои Гурўҳи Бонки Исломии Рушд, ба мисли Корпоратсияи исломии су?уртаи сармоягузориҳо ва қарзҳои содиротӣ, Корпоратсияи исломӣ оид ба рушди бахши хусусӣ таваҷҷўҳи хос зоҳир гардид.
Аҳмад Муҳаммад Алӣ ба Сарвари давлат Эмомалӣ Раҳмон ва мардуми Тоҷикистон барои пазироии самимии ҳамоиши Вазирони корҳои хориҷии давлатҳои аъзои Созмони Конфронси Исломӣ арзи сипосу миннатдорӣ намуд.