Президенти Ҷумҳурии Тоҷикистон Эмомалӣ Раҳмон бо масъулини ҳукумати мамлакат ва Дастгоҳи иҷроияи Сарвари давлат, роҳбарони як қатор вазорату идораҳои марбута ва шахсони дигари дахлдор машварати корӣ доир намуд.
Дар машварат масоили вобаста ба бартараф намудани оқибатҳои офатҳои табиӣ, иҷрои супоришҳои Сарвари давлат, ки дар паёми Президенти мамлакат ба Маҷлиси Олии Ҷумҳурии Тоҷикистон омадаанд ва рафти татбиқи лоиҳаҳои инвеститсионӣ баррасӣ шуд.
Сарвари давлат Эмомалӣ Раҳмон бо назардошти вазъи ногувори зиндагии мардуми аз боришоти боронҳои сел зарардида, хусусан дар ноҳияи Восеъи вилояти Хатлон ба роҳбарони вазорату идораҳои дахлдор ва мақомоти иҷроияи маҳаллии ҳокимияти давлатӣ дастур дод, ки баҳри ҳарчи зудтар бартараф намудани оқибатҳои офатҳои табиӣ, барқарор намудани роҳу пулҳо ва дигар инфрасохтори зарурӣ барои зиндагии муқаррарии мардум чораҳо андешанд.
Ба ҳукумати мамлакат ва Роҳбари Дастгоҳи иҷроияи Президенти Ҷумҳурии Тоҷикистон дастур дода шуд, ки рафти татбиқи нақшаи чорабиниҳоро оид ба иҷрои супоришҳои Сарвари давлат, ки дар паёми Президенти мамлакат ба Маҷлиси Олии Ҷумҳурии Тоҷикистон омадаанд, зери назорати доимӣ бигиранд.
Супоришҳои мушаххас ҳамчунин оид ба татбиқи босамари лоиҳаҳои инвеститсионии давлатӣ ва дигар масъалаҳои мавриди таваҷҷўҳ дода шуд.