Президенти Ҷумҳурии Тоҷикистон Эмомалӣ Раҳмон бо намояндагони сершумори созмонҳои байналмилалӣ ва муассисаҳои минтақавию ҷаҳонии молиявӣ мулоқот доир намуд.

Дар вохӯрӣ пасомадҳои таъсири бӯҳрони ҷаҳонии молиявию иқтисодӣ ба Тоҷикистон ва мушкилоти имрӯзаи вобаста ба таъминоти нерӯи барқ дар кишвар баррасӣ шуд.

Сарвари давлат Эмомалӣ Раҳмон намояндагони созмонҳои байналмилалӣ ва муассисаҳои минтақавию ҷаҳонии молиявиро ба ҳамкории васеи мутақобилан судманд баҳри таҳия ва татбиқи лоиҳаҳои нави инвеститсионӣ, пеш аз ҳама дар соҳаҳои бунёдии иқтисодиёти Тоҷикистон, аз ҷумла гидроэнергетика даъват намуд.

Ҳамчунин таъкид гардид, ки Тоҷикистон дар шароити ҷудо гаштани Узбекистон аз шабакаи ягонаи энергетикии Осиёи Марказӣ ва мушкилоти дигари иқтисодӣ ба кӯмаки бештар ва ҳадафманди кишварҳо ва созмонҳои байналмилалии мададрасон ниёз дорад.