Имрўз Президенти Ҷумҳурии Тоҷикистон Эмомалӣ Раҳмон бо масъулини Ҳукумати мамлакат ва Дастгоҳи иҷроияи Сарвари давлат доир ба вазъи таъмини аҳолӣ бо нерўи барқ машварати корӣ доир намуд.

Доир ба ин мавзўъ гузориши Вазири энергетика ва саноат Гул Шералӣ ва Раиси ШСХК «Барқи Тоҷик» Абдулло Ёров шунида шуд.

Иттилоъ дода шуд, ки сабаби асосии норасоии нерўи барқ паст шудани ҳарорати ҳаво дар моҳҳои марту апрел, кам гаштани ҳаҷми оби дарёи Вахш ва ба ҳадди бўҳронӣ поён омадани сатҳи об дар обанбори нерўгоҳи Норак аст. Чунонки зикр гардид, то ба ин ҳадд номусоид омадани обу ҳаво дар фасли баҳор ва боло нарафтани ҳарорат аз солҳои 30 асри гузашта бори нахуст ба назар мерасад. Таъкид гардид, ки вазъи барқтаъминкунӣ дар мамлакат танҳо дар ҳолати аз 25-30 дараҷа боло рафтани гармии ҳаво беҳтар мегардад.

Сарвари давлат Эмомалӣ Раҳмон ба масъулини дахлдор дастур дод, ки барои беҳ намудани вазъи барқтаъминкунии аҳолӣ аз ҳамаи имкону захираҳои мавҷуда истифода баранд. Аз тамоми истифодабарандагони нерўи барқ даъват карда шуд, ки аз он сарфакорона истифода баранд.

Ҳамчунин таъкид гардид, ки овозаҳои иғвоангези дар миёни мардум паҳншаванда, ки гўё Ҳукумати Ҷумҳурии Тоҷикистон дар ҳамин ҳолат ба Ҷумҳурии Исломии Покистон нерўи барқ мефурўшад, ҳеҷ асоси воқеӣ надорад, зеро айни ҳол миёни Тоҷикистону Покистон хатти интиқоли нерўи барқ вуҷуд надорад.

Ба роҳбарияти сохторҳои масъули давлатӣ дастур дода шуд, вазъи мавҷударо ба мардуми шаҳру навоҳӣ ва деҳоти кишвар дуруст фаҳмонанд.