31 май Президенти Ҷумҳурии Тоҷикистон Эмомалӣ Раҳмон дар қароргоҳи муваққатии худ дар Минск - "Заславл-3" бо Президенти Ҷумҳурии Молдова Владимир Воронин вохӯрд.

Зимни вохӯрии дӯстона ҳолат ва дурнамои ҳамкориҳои Тоҷикистону Молдова дар заминаи дуҷониба ва дар доираи ИДМ мавриди муҳокима қарор дода шуданд.

31 май Президенти Ҷумҳурии Тоҷикистон Эмомалӣ Раҳмон ҷиҳати ширкат дар нахустмаҷлиси Шӯрои байнидавлатии Иттиҳоди иқтисодии Евразия (ЕврАзЭС) ба шаҳри Минск сафар кард.

26 май Президенти Ҷумҳурии Тоҷикистон Эмомалӣ Раҳмон машварати корӣ доир намуд, ки он ба масъалаи вазъияти имрӯза ва тараққиёти соҳаи кишоварзию саноатии мамлакат бахшида шуд.

Президенти мамлакат ҳисоботи муовини сарвазири ҷумҳурӣ Қозидавлат Қоимдодов ва роҳбарони вазорату идораҳои ҷумҳурӣ, муттасадиёни вазъияти корҳо дар соҳаи кишоварзию саноатӣ ва таъмини мустақилият ва амнияти озуқаи мамлакатро баррасӣ ва таҳлил намуд.

25 май мулоқоти сардорони давлатҳои аъзои Аҳдномаи амнияти дастаҷамъӣ дар ҳайатҳои маҳдуд ва мукаммал сурат гирифт ва бо иштироки онҳо маросими имзои ҳуҷҷатҳои таҳияшуда баргузор шуд.

25 май Президенти Ҷумҳурии Тоҷикистон Эмомалӣ Раҳмон дар Ереван бо Президенти Федератсияи Россия Владимир Путин мулоқот намуд.

Вохӯрӣ дар ваъияти ғайрирасмӣ ба вуқӯъ пайваст.

Эмомалӣ Раҳмон ва Владимир Путин ба қарорҳои дар иҷлосияи Шӯрои амнияти дастаҷамӣ ба имзо тайёр гардида оид ба ташкили қувваҳои зудамали дастаҷамъӣ дар Осиёи Марказӣ баҳои баланд доданд.

24 май Президенти Ҷумҳурии Тоҷикистон Эмомалӣ Раҳмон бо Президенти Ҷумҳурии Арманистон Роберт Кочерян мулоқот намуд.

Ҳангоми мулоқот ҷонибҳо таҳлили умумии муносибатҳои ҳамкории Тоҷикистону Арманистонро дар тӯли солҳои соҳибистиқлолӣ баррасӣ ва таҳлил намуданд.

Зикр гардид, ки дар муддати солхои 1992-2001 Тоҷикистон ва Арманистон 10 ҳуҷҷати ҳамкориҳои дуҷонибаро ба имзо расонидаанд.

24 май Президенти Ҷумҳурии Тоҷикистон Эмомалӣ Раҳмон дар Саммити давлатҳои аъзои Аҳдномаи амнияти дастаҷамъӣ иштирок ва суханронӣ намуд.

24 май Президенти Ҷумҳурии Тоҷикистон Эмомалӣ Раҳмон ҷиҳати иштирок дар саммити давлатҳои аъзои Аҳднома оид ба амнияти дастаҷамъӣ ба пойтахти Ҷумҳурии Арманистон шаҳри Ереван сафар кард.

23 май Президенти Ҷумҳурии Тоҷикистон Эмомалӣ Раҳмон ба Дабири Кулли СММ Кофи Аннан ва Директори Кулли ташкилоти Озуқаворӣ ва кишоварзии СММ Жак Дюф муроҷиат намуда, хоҳиш кард, ки ба Ҷумҳурии Тоҷикистон дар давраи барояш басо душвор кӯмаки башардӯстона расонида, бо гандум, орд, равғани растанӣ, маҳсулоти ширӣ, қанд, ҳамчунин гандуми тухмӣ ва дигар маҳсулоти озуқаворӣ таъмин намоянд.

Сардори давлат изҳори боварӣ намуд, ки масъалаи мазкур ҳалли мусбии худро меёбад.

22 май Президенти Ҷумҳурии Тоҷикистон Эмомалӣ Раҳмон ба Президенти ИМА Ҷорҷ Буш, Канслери Олмон Герхард Шрёдер, Сарвазири Канада Жан Кретйен, Раиси комиссияи Иттиҳоди Аврупо Романо Проди нома навишта, оид ба оқибатҳои хушксолӣ маълумот дод ва аз онҳо хоҳиш намуд, ки ба халқи Тоҷикистон кӯмаки амалӣ расонанд.